عن القدس أحدثكم 1

فجأة أجا عبالي أكتب عن القدس. علشان كلكم بتشوفوها من بعيد حلوة، وبترسمولها الهالة المقدسة، علشان كلكم بتفكرو انه القدس أحلى بلد، وأنها أجمل بلد.
كل مرة بصير أحكي أشياء مش منيحة عن القدس، بس علشان أفرجيكم قديش هي بلد حزين وبعاني، بس هاي المرة بدي أحكي ليش بحب القدس.
أول مرة بحياتي تعرفت على مقدسيين ومقدسيات والضفة الي أصدقاء من القدس والضفة لما كان عمري 17 سنة، وبأميركا، تخيلو؟ أولاد بلدي بتعرف عليهم بأميركا، أنه حسب أي منطق مش فاهمة ..
المقدسيين علموني كثير أشياء، غير اتقان صوت الخليلي بالقدس وهو يقول: “يا خاااال” أو “12 قلم بشيكل معقوووووول” أو بكون بدو يضربك وهو يقول “كيلو البندورة ب4 شيكل”….
المقدسيين علموني شو يعني أكون فلسطينية – دون مبالغة، وباختصار.
بكل مقدسي ومقدسية شفت قصة، وشفت انسان، كثير ممكن يقولولي عن مين بتحكي؟ الناس متخلفين بالشارع والناس والناس والناس والناس …
بفكر بحكي عن ناس بحبهم من القدس، ابتداء من الستات الي ببعن بقدونس عالطريق، وانتهاءً بعمنا سميح الي ببيع اكسسوارات على قبال حمص لينا، الي كل مرة بروح عنده بقعد بعملي تقرير يقولي: “ضعفانة؟ نصحانة؟ بتحبي؟ بتحبيش؟ خلصتي جامعة؟ كيف الدرس؟ قديش صرته بالجامعة بعيلتكم؟”، نفسه عمنا سميح الي بقولنا: “شايفة هذا الحجر؟ هذا الحجر من حجارة من زمن الفراعنة، بس أنا ببيعه رخيص، ولو انه مهرب” واحنا بنصدق عادي وبنشتري.
برجع لأنه كل مقدسي ومقدسية في قصة، علمتني كثير، وفهمتني قديش الاحتلال شوه المدينة، وخلا أهلها تعبانين، بس مع هيك كلهم بضحكو، وبعرفش كيف كل هاي الطاقات للضحك.
بالشغل وأنا بباقة لما قعدت سنتين بعد المدرسة، مشفتش عند الناس ربع طاقة أهل القدس بالعطاء. كان يجي عنا عالشغل ناس من كل البلدان، وأكثر ناس أنبسط معهم أهل القدس.
ورحت عالقدس وعشت هناك. وعشت مع أهل القدس، وبحبهم، عنجد بحب أهل القدس، يمكن بعدني مش قادرة أتصالح نفسيا مع المدينة، ومش قادرة أبعد عن هدوء الشمال. بس السنة لأول مرة بفهم القدس، وبحاول أتصالح معها.
أهل القدس علموني القناعة بس مع القناعة الاصرار، وأهل القدس علموني الصبر بس مع الصبر أسعى أنه أغير، وأهل القدس علموني أضحك وأنا انزل دمعتي، وأهل القدس علموني أكون مشاكسة بس بنفس الوقت مواظبة. كيف الأخيرة بعرفو يعملوها بعرفش.

القدس بكل بشاعتها بتنحب، بس القدس مش بلد مريح تعيش فيه – أبدًا مش مريح، إذا حابب انه تعيش جو فرح ونقاهة وحياة القدس مش المكان، لأنه القدس بتحشرك بأماكن أنت بغنى عنها، وبتحشرك بأماكن متعبة، بتخليك تفكر، تفكر كثير، والتفكير مرات مش منيح لأنه متعب، ومرات منيح لأنه بخلينا ننتج.

أنا مش متندمة لأنه أنا اخترت القدس. ومش متندمة على كل لحظة فيها.